Դատվածության բացակայության/առկայության մասին տեղեկանք
ՀՀ-ում դատվածության և հետախուզման առկայության մասին տեղեկանք կարելի է ստանալ ՀՀ տարածքում` ՀՀ ԱԳՆ հյուպատոսական վարչությունից, իսկ օտարերկրյա պետություններում` ՀՀ դիվանագիտական ներկայացուցչություններից և հյուպատոսական հիմնարկներից: Տեղեկանքում զետեղվող` անձի վերաբերյալ տվյալները ստուգվում են ՀՀ ոստիկանության ինֆորմացիոն կենտրոնում:
Տեղեկանքի տրամադրումը ՀՀ ԱԳՆ հյուպատոսական վարչությունում.
Տեղեկանք ստանալու համար ընդունելությունը ՀՀ ԱԳՆ հյուպատոսական վարչությունը կազմակերպում է երկուշաբթի, երեքշաբթի, հինգշաբթի և ուրբաթ օրերին ժամը 10.00-12.00-ին` ՀՀ ԱԳՆ վարչական շենքի Ամիրյան փողոցի կողմում գտնվող քաղաքացիների ընդունելության սրահում: Քանի որ նշված տեղեկանքը պարունակում է անձնական տեղեկություններ, դիմողները փաստաթղթերը հանձնում են անձամբ կամ լիազորված անձի միջոցով: Տեղեկանքը ստանալու համար անհրաժեշտ է ներկայացնել հետեւյալ փաստաթղթերը.
- Սահմանված ձևի դիմում (տրամադրվում է տեղում),
- Անձնագիր (բնօրինակ և պատճեն): Եթե դիմումը ներկայացվում է ներկայացուցչի միջոցով, ապա՝ լիազորված անձի անձնագիրը, լիազորագիրը և տվյալ անձի անձնագրի պատճենը: Այս դեպքում լիազորագիրը պետք է հաստատված լինի ՀՀ միջազգային պայմանագրերով կամ ՀՀ օրենսդրությամբ սահմանված կարգով.
- Պետական տուրքի վճարման անդորրագիր: Պետական տուրքի դրույքաչափը 5,000 (հինգ հազար) ՀՀ դրամ է: Պետական տուրքը կարող է վճարվել ցանկացած առևտրային բանկում կամ տեղում՝ ակնթարթային վճարումների համակարգի (տերմինալի) միջոցով: ՀՀ պետբյուջեի գանձապետական հաշվեհամարն է 900005163515:
ԾԱՆՈԹՈւԹՅՈւՆ
- Տեղեկանքը տրամադրվում է երկլեզու` հայերեն և օտար լեզվով (անգլերեն, գերմաներեն, իսպաներեն, ռուսերեն, ֆրանսերեն)` դիմողի ցանկությամբ կախված ներկայացման երկրից,
- Տեղեկանքը տրամադրվում է 5 աշխատանքային օրվա ընթացքում,
- «Օտարերկրյա պաշտոնական փաստաթղթերի օրինականացման պահանջը չեղյալ հայտարարելու մասին» Հաագայի 1961թ. հոկտեմբերի 5-ի կոնվենցիայի (APOSTILLE-ի մասին) մասնակից պետության իշխանություններին ներկայացնելու դեպքում տեղեկանքը հաստատվում է ապոստիլով: APOSTILLE-ի մասին կոնվենցիայի մասնակից պետությունների ցանկին կարող եք ծանոթանալ այստեղ:
- ՀՀ ԱԳՆ հյուպատոսական վարչությունը տրամադրում է նաև օտարերկրյա պետություններում դատվածության և հետախուզման առկայության մասին տեղեկանքներ` այդ պետությունների դիվանագիտական ներկայացուցչություններ կամ հյուպատոսական հիմնարկներ կատարվող հարցումների հիման վրա: ՀՀ արտաքին գործերի նախարարությունը չի երաշխավորում տեղեկանքների ստացումը կարճ ժամկետներում (ծառայության ժամկետ սահմանել հնարավոր չէ): Որոշ պետություններից նման տեղեկանքներ ստանալն անհնար է:
Տեղեկանքի տրամադրումը ՀՀ դիվանագիտական ներկայացուցչություններում կամ հյուպատոսական հիմնարկներում.
Տեղեկանք ստանալու համար հարկավոր է անձամբ (կամ լիազորված անձի միջոցով) ՀՀ դիվանագիտական ներկայացուցչություն կամ հյուպատոսական հիմնարկ (ցանկը տեսնելու համար սեղմել այստեղ)՝ ներկայացնելով հետևյալ փաստաթղթերը.
- Սահմանված ձևի դիմում (տրամադրվում է տեղում),
- Անձնագիր: Եթե դիմումը ներկայացվում է ներկայացուցչի միջոցով, ապա՝ լիազորված անձի անձնագիրը, լիազորագիրը եւ տվյալ անձի անձնագրի պատճենը: Այս դեպքում լիազորագիրը պետք է հաստատված լինի ՀՀ միջազգային պայմանագրերով կամ ՀՀ օրենսդրությամբ սահմանված կարգով.
- Պետական տուրքի վճարման անդորրագիր.
- Պետական տուրքի դրույքաչափը 25,000 (քսանհինգ հազար) ՀՀ դրամ է.
- Մեկ գունավոր լուսանկար՝ 35x45 մմ չափսի (տեղեկանքը լուսանկարով ստանալու ցանկության դեպքում):
ԾԱՆՈԹՈւԹՅՈւՆ
- Տեղեկանքը տրամադրվում է հայերեն և օտար լեզվով (անգլերեն, գերմաներեն, իսպաներեն, ռուսերեն, ֆրանսերեն եւ այլն)` դիմողի ցանկությամբ կախված ներկայացման երկրից,
- Ծառայությունը մատուցվում է 8 աշխատանքային օրվա ընթացքում
Առավել մանրամասն տեղեկությունների համար խնդրում ենք ուղարկել նամակ visa.division@mfa.am էլեկտրոնային փոստի հասցեով կամ զանգահարել (+374 60) 620-508, 620-544 հեռախոսահամարով յուրաքանչյուր աշխատանքային օր, ժամը 14:00-18:00-ն: