COP17-ին ընդառաջ ընդունելություն ՄԹ խորհրդարանում

15 հունիսի, 2026

Հունիսի 15-ին Միացյալ Թագավորությունում ՀՀ դեսպանությունը՝ ICCF-UK-ի հետ համատեղ, Պորտկուլիս հաուսի (Portcullis House) «Էթլի» (Attlee) սրահում համակազմակերպել է խորհրդարանական ընդունելություն՝ նվիրված Կենսաբանական բազմազանության մասին կոնվենցիայի կողմերի առաջիկա 17-րդ համաժողովին (COP17):

Ընդունելությունը հյուրընկալվել էր Միջազգային պահպանության հարցերով միջկուսակցական խորհրդարանական խմբի նախագահ Բարի Գարդիների կողմից և համախմբել էր խորհրդարանականների, դիվանագետների, բնապահպանական կազմակերպությունների ներկայացուցիչների և այլ շահագրգիռ կողմերի՝ քննարկելու միջազգային համագործակցության կարևորությունը գլոբալ կենսաբազմազանության անկման միտումներին հակազդելու գործում:

Իր ելույթում դեսպան Վարուժան Ներսեսյանն ընդգծել է Հայաստանի հաստատակամ հանձնառությունը շրջակա միջավայրի պահպանության, կենսաբազմազանության պաշտպանության և բազմակողմ համագործակցության հարցերում: Դեսպանը շեշտել է, որ առաջիկա COP17 բանակցությունները կարևոր հնարավորություն են միջազգային հանրության համար՝ հզորացնելու հավաքական ջանքերը՝ ուղղված կենսաբազմազանության կորստի կանխմանը և գալիք սերունդների համար բնական էկոհամակարգերի պաշտպանությանը: Նա նաև նշել է Կենսաբանական բազմազանության մասին կոնվենցիայի և Կունմին-Մոնրեալի գլոբալ կենսաբազմազանության շրջանակային ծրագրի ներքո ստանձնած հանձնառությունները ազգային քաղաքականության և պահպանության նախաձեռնությունների միջոցով կյանքի կոչելու ուղղությամբ Հայաստանի շարունակական ջանքերը:

Դեսպան Ներսեսյանն առանձնահատուկ նշել է նաև միջազգային գործընկերների, այդ թվում՝ Միացյալ Թագավորության հետ սերտորեն համագործակցելու Հայաստանի պատրաստակամությունը՝ բնության պահպանության, կայուն զարգացման և կլիմայական դիմակայունության ոլորտներում ընդհանուր առաջնահերթություններն առաջ մղելու նպատակով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր