Հայոց Ցեղասպանության 99-րդ տարելիցին նվիրված միջոցառումներ Լոնդոնում

28 ապրիլի, 2014

Ապրիլի 24-ին Լոնդոնում՝ Թուրքիայի դեսպանության դիմաց կազմակերպված լուռ բողոքի ակցիայիով մեկնարկեց Հայոց Ցեղասպանության 99-րդ տարելիցին նվիրված միջոցառումների շարքը:

Նույն օրը երեկոյան Սբ. Եղիշե եկեղեցում կայացավ հուշ երեկո նվիրված Ցեղասպանության զոհերի հիշատակին: Միջոցառմանը ելույթ ունեցան Բրիտանահայ համայնքային խորհրդի նախագահ Արա Փալամուդյանը, Մեծ Բրիտանիայի և Իռլանդիայի թեմի առաջնորդ Վահան եպիսկոպոս Հովհաննիսյանը, ընթերցվեց նաև դեսպան Արմեն Սարգսյանի ուղերձը:

ամերգային ծրագրին մասնակցում էին Լոնդոնի շաբաթօրյա և կիրակնօրյա դպրոցի սաները, ինչպես նաև հայ և բրիտանացի դերասաններ ու երաժիշտներ: Հնչեցին հայ և եվրոպական երգահանների գործեր, ասմունքվեցին հայ բանաստեղծների՝ Հայոց Ցեղասպանությանը նվիրված ստեղծագործություններ:

Ապրիլի 26-ին կայացավ Հայոց Ցեղասպանության զոհերի հիշատակին նվիրված ամենամյա քայլարշավը: Լոնդոնի կենտրոնական փողոցներով անցան ավելի քան 1000 հայեր՝ Հայաստանի և Արցախի դրոշներով ու Ցեղասպանությունը դատապարտող պաստառներով՝ վանկարկելով Ցեղասպանության ճանաչումը պահանջող կոչեր: Քայլարշավի ավարտին՝ ՀՀ դեսպանության, Բրիտանահայ համայնքային խորհրդի, Հայ Առաքելական եկեղեցու Մեծ Բրիտանիայի և Իռլանդիայի թեմի, ինչպես նաև Հայոց Ցեղասպանության 100-ամյակի միջոցառումները համակարգող հանձնաժողովի կողմից ծաղկեպսակներ զետեղվեցին Լոնդոնի կենտրոնական Ուայթհոլ փողոցում գտնվող «Փառապանծ զոհերի» կոթողին:

Նույն երեկոյան Սբ. Եղիշե եկեղեցում տեղի ունեցավ ՀԲԸՄ լոնդոնյան մասնաճյուղի կողմից հովանավորվող նորաստեղծ կամերային նվագախմբի անդրանիկ համերգը՝ նվիրված Հայոց Ցեղասպանության զոհերի հիշատակին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր